مرحبا..
صباح الورد..
احزني عدم وجود تفاعل:annoyed:..بس لعيون اخي رفيع الشان اضع بين ايديكم الجزء الثاني.
*في العين و في بيت حمد محمد*
(كانوا الأهل كلهم يالسين يتغدون حمد و حرمته والبنات غايه و ساروه ماعدا اليده صبيحه و أحمد لأنه بعده ما رد من الجامعه)
حمد: أميه تغدي.
اليده: تعرف إنه الغدا ما يهنالي بلا وليدي أحمد.
ساروه: احم احم لازم هب دلوع العايلة حموود هذا.
اليده: لا تقولين عنه حمود .. هذا أحمد شيخج و شيخ طوايفج بعد.
غايه: ياالله ييدوه .. ونحن وين روحنا؟؟
اليده: حتى انتن غاليات بس هو غير.
ساروه: صدق انكم ما تراعون شعور البنات فهالبيت .. بس شو نقول؟؟؟؟ أمرنا لله.
اليده(اطالعها بعين) : بشو يالسه تهذربين؟؟؟؟
ساروه:هااا؟؟؟ لالا ما ماشي.
حمد: لا تزعلن يا بنات حمد .. أحمد غالي عند يدته ، وإنتن غاليات عند أبوكن و أمكن. صح أم أحمد.
سلامه: حشااااا .. كلهم غاليين عندي،ما عندي واحد أغلى عن الثاني.
غايه(بدلع): اجوف ابويه ماحد يحبنا.
حمد:ههه أبوج يحبج ياغايه.
اليده:هب سادنج حب الخبيل لج؟
غايه: يدوووه منو قصدج؟؟
اليده: ما غيره فهد،مادري عشو متخبل؟ لكن ماعليه اسبوع و لا اسبوعين و بيلقعج فبيت أبوج.
غايه"أنا إللي بييني الخبال من كلام يدووه": جوووف أبويه يدووه شتقول.
حمد: لازم يتخبل عليها فهد،وأي ريال فالدنيا بعد،دين وجمال و نسب و حسب و مال،شويبا زياده عن جي بعد،بنيتي كامله مكمله،والكمال لله.
غايه(تمس يدتها):ههه اجوفين يدوه.
ساروه:هههههه القرد في عين أمه غزال.
غايه: ساروووووه.
ساروه(شرقت بالعيش):كح كح حشا روعتيني أتمصخر و ياج ، أسميج قمر تلقين من الحلاه،سبحان الله طالعه على منوه ما ادري.
اليده: أنا أدري على الغالي ولد الغالي.
غايه:ردينا على طاري ياللي،حشا ما اطوف يلسه إلا و نطقتوا اسم أحمد.
سلامه: غايه بس هذا أخوج.
غايه: من حقي إمايا،من حقي،أنا أغار.
ساروه(كملت):صدقها نحن نغار من هالدلع الزايد،لا بعد احين غايوه بتلقا حد يدلعها الا أنا (تسوي عمرها تصيح) ما حد بيدلعني.
حمد: إنتي دلوعة أبوج يالغاليه.
ساره(ترفع إيديها): يالله يا رب خللي ولد محمد،خللي الغالي حمد بو ساروه.
غايه(وهيه ماسكه الديو): وأنا؟؟!! والا خلاص انتهت صلاحيتي!! جوفو تراكم غلطانين باقي اسبوع وشوي و تنتهي صلاحيتي،لازم تمللوني من الدلع.
اليده:هههه لاحقه عليه الدلع،لاحقه.
حمد:أنا بناتي صلاحيتهن ما تنتهي إن كانن فبيت أبوهن و إلا فبيت رياييلهن.
غايه:هههه عاش أبو غايه....عاش.
ساروه:هههه هذا هو الكلام و إلا بلاش..فديت عمرك أنا.
(يرن موبايل غايه و ترد من دون ما اطالع منو متصل)
فهد: يهلا بالغاليه.
غايه(تبتسم و الأصح ابتسامتها بتشق حلجها): أهلين فهد.
فهد: فهد حاف؟
غايه: لحظه .... لحظه شوي.
ساروه(بالمصري):جبنا سيرة الأط ، جه ينط.
غايه:أط فعينج ، شيخج (بصوت خفيف) فديت روحه.
ساروه(تكمل بالمصري): يالتني افتكرت مليون جنيه.
غايه: والله إنج ..... ما قلتلج هذا شيخج؟؟!! ملايين الدنيا كلها ما تسوى أثره.
الكل:ههههههههه
ساره: ههههههه (تغمزلها) أووهوووب .... أووهووووب.
اليده: ما قلتلكم متخبل عليها،كالحين و يتصل حتى الغدا ما يهنيه عليها.
(غايه مب يالسه تسمع لرمسة يدتها،غسلت إيدها و روحت الحجره الثانيه)
حمد: أمه كلي ، تراه أحمد يمكن روح مكان و يا ربعه.
اليده: برايه الغالي .. بترياه لين ما إيي.
(في الحجره الثانيه)
غايه: يهلا بحبيبي فهد .. ومخفف آلامي.
فهد: أهلين بالغلا كله (وهويتطنز) بس شفيج متألمه يحياتي ههه؟؟؟
غايه: يدوووه .. ما دريبها شفيها عليه .. أحسها تكرهني.
فهد:ههههههخخخخخ أفففاااا عليج .. مره وحده تكرهج؟؟؟؟ عاد ماحد ينكرإنه قلب يدوتي أبيض عن الحليب.
غايه: إنته تعال جوفها و بتصدق كلامي .. تقول عديلتي مب يدوه.
فهد(بصوت واطي): والله يدووه تعرف تمثل دور الشريره.
غايه: شقلت؟؟؟
فهد: يالس أقول جانج تبين .. أحين بيي بيتكم وبشلج عنهم .. بخليهم يحسون بقيمج.
غايه: عقب اسبوع وشوي و عليك خير،، ومثل ما قالت يدووه اسبوع والا اسبوعين بتعافني وبتعقني ببيت أبويه.
فهد:الله يسامحج غايوتي أعافج؟؟؟ أنا أعاف الدنيا كلها و لاأعافج .. وبعد حد يعق روحه بإيده.
غايه(تروح للدريشه إللي تطل على بيت عمها أبو فهد): شقصدك؟؟؟؟
فهد: ولو غايوه .... إن اللبيب من الإشارة يفهم.
غايه تتغابى: أنا مب لبيبه ما فهمت.
فهد: إنفهمج يا غبيه .. إنتي روحي و حياتي كلها.
غايه:ههههههه فديت إللي أنا روحه و حياته.
(كملت غايه سوالفها ويا فهد)
(و في الصاله انفتح الباب مره وحده)
أحمد(و هو يفر كتبه وسفرته عوحده من الطاولات ويحطي نظارته الشمسيه عراسه): يالله يغربل الجامعه ، قلتلكم ما باها ... ماباها ... ما صدقت افتك من المدرسه إلا و دششوني غصب للجامعه بس شو نقول حكم القوي عالضعيف......
حمد: أحمد شهاذا ؟؟ شو انته داش زرب هوش؟!
أحمد(بظيج): السلام عليكم.
الكل: وعليكم السلام.
اليده: يالله فديت هالهايه أنا،تعال فديتك،تعال صوب يدتك،وخبرها بإللي مضيجبك.
(أحمد يسلم على يدته أول بعدين على ابوه و امه)
ساروه: أحمد نسيتني.
أحمد(بظيج): فاظلج أنا؟؟
حمد: أحمد شهالرد؟
أحمد:..................(يالس عدالي يدته)
ساره(حست إنه اخوها ظايج لأنه مب من عوايده يعاملها جذيه): خله خله ابويه إللي منه يعطيه سالفه نحنوح يدته.
أحمد:غيرانه، (يلتفت ليدته) يدوه يدوه حبيني (باسته يدته على خده الحار من الشمس) حبتج العافيه يالغالية(و يطالع ساره بنظره تحرق، ويسويلها حره بإيده).
ساروه(بصوت خفيييف):يااااااااااااهل
سلامه:أحمد شفيك داش علينا جذيه؟؟
أحمد: والله يا امايه هاذي الجامعه إللي بتنقع الشيب فراسي.
اليده: ياويلي عليك يوليده،خلها هالزفت و يلس في البيت عند يدك و إلا اشتغل فشركة ابوك.
أحمد(يلوي عيدته): يالله فديت يدوة أحمد هي الوحيده اللي فاهمتنه وحاسه بتعبه و ضيجه.
حمد(معصب): والله؟! تبا تيلس في البيت مثل الحريم، وإلا تباني أشغلك عندي بشهادة ثنويه بس.... تحلم .... بتكمل دراستك غصبن عنك.
سلامه: يا حمد الشي بالغصب ما يصير.
حمد: انا أدرى بمصلحته..هذا ولدي الوحيد إللي قلبي ما ارتاح إلا يوم انولد..أباله مستقبل زين .. ومنو بيدير حلالي بعد ما اندك تحت التراب؟؟ (الكل سكت) واحد بشهادة ثانويه بس!! والله لتصيرون أفقر عن الفقرا.
أحمد: أبويه بس....
حمد(يقاطع أحمد): بتتذكر عقب جم سنه .. إن كنت حي بتي و بتحبني على راسه .. وبتقول أجديت يبويه .. دليتني عالصواب .. وإن كنت ميت بتقول الله يرحمه أبويه زين اللي سواه.
سلامه : فال الله ولا فالك يبو أحمد من بعد عمرن طويل إن شاء الله.
أحمد: خلاص أبويه،مثل ما تبا،بطيع شورك،تراهم يقولون رب ضارة نافعه.
اليده: طيع شور ابوك يبويه و ما بتظيع،تراني انا ما اعرف شي فهالدنيا وأتحسب راحتك هي سعادك .. ادرس يا الغالي ادرس .. و بعدين بترتاح مثل ما ابوك مرتاح الحين فشغله لانه حصله من تعب يبينه.
أحمد(يبا يغير جو النقاش..قال بالفصحى): سمعا و طاعه يا عائلتي الكريمه .. ولكن ساره لم أسمع أي نصيحة منك،فأتحفيني بإحدى نصائحك الثمينه التي لا تعادل الألماس ثمنا.
ساروه(تكمل بالفصحى): أخي لا تدرس اجلس في المنزل كالفتيات ،أو كي تكون رجلا اذهب للمزرعه،فهي تحتاج إلى عضلاتك القويه و بنيتك الرائعه،هاا ما رأيك بنصيحة أختك الفيلسوفه ساره؟؟؟
أحمد(يتخقق كعادته):أنا ولد حمد أخرب جمالي في المزرعه؟!
ساروه: أونه عاد!! بس بس عن الخقة تراهم واايدين إنته بالنسبة الهم ولا شي..
اليده(كل هالوقت ساكته لأنها ما كانت تفهم شو يالسين يهذربون، لكن فهمت على آخر جمله لساروه) فديته وليدي،محد أخير عنه فهالدنيا،شيخ المزايين والله،وما بتيب حرمه ولد شراته،فذمتكم لقيتو مثل هالحلاه في الرياييل،الويه إبييض و العيون ما عليهن كلام (هنيه احمد يبربش بعيونه لساره) و شعره أنعم عن الحرير.
أحمد: إحم إحم أحمد حمد محمد .. العمر عشرين .. هل من عروس؟؟
سلامه(تضحك على سوالف عمتها وولدها):ههههه اول مره أدري إنه ولدي حلو جذيه. تعال تعال خلني أطالعك زين.
(دشت غايه عليهم فهالوقت)
غايه: إللي يجوفكم اطالعون أحمد جذيه بيقول آخر مره هاذي اجوفونه فيها.
حمد: فال الله و لا فالج.
أحمد(بخقه): تعرفين ليش جيه يطالعوني؟
غايه: ليش يا عمري هه؟
أحمد:ههه يتمتعون بجمال ويهي ، يا غايوه أهلج اكتشفوا إنه عندهم نعمه إنما إيه .. (يغمزلها) إنتي بس قولي سبحان الله.
غايه:الله يعينا من الخقه الزايده عندك..ههههه سبحان الله.
ساروه: هيه والله،اكبر خقاق في العالم،على شو تخقق فذمتك؟
اليده: من حقه يتخقق و يجوف نفسه عليكم، طالع على الغالي محمد الله يرحمه.
الكل : الله يرحمه.
غايه:ههه وصل شيطان البيت و ما خلاكم تكملون غداكم ، يالله كملوا.
أحمد: شيطان البيت فعينج يا الدبه.
ساروه:هههه أحمد وين الاحترام؟؟ إختك عروس الحين و إنته تسبها جيه؟
أحمد:ههه أوووووه نسيت آسف عروسنا،كله و لا زعلج،ما فيني أخاف المعرس يكسرلي ضلوعي لو درى.
(البقية ساكتين لأنهم متعودين على هالسنفونية)
غايه(تسوي عمرها زعلانه):ما اتقبل أسفك... تعال حبني على راسي و بعدين بفكر أسامحك و إلا لا.
أحمد:هههههه يوم يبيض الديج هههه.
سلامه:أحمد تغدا..مد إيدك .. بسك من الهذره .
أحمد(يرمس يدته): والغاليه ليش ما تغدت؟ تتريا حبيبها، صح؟
اليده:عيل! تحيدني الأكل ما يهنالي بلياك.
أحمد: تصدقين شبعتني هزبة الدكتور، بس عشانج بتغدى.
ساروه: هزبة الدكتور؟؟!!
أحمد: شوووو؟
ساروه: إنته قلت.
أحمد:إنتي تحلمين أظنيبج،روحي خذيلج قيلوله شويه،بترتاحين عقب، يالله يالله روحي بترتاحين عقب تراج.
اليده(بصوتها الهزيل): هههههه ما عورك حلجك من الرمسه من اول ما ييت إلا و إنته ترمس،فدييتك كل،ودي أجوفك مربرب شويه.
أحمد:أفااااااااااااااااا يدوووه تبين البنات يتشاردن يوم يجوفني.
غايه:ههه عاد البنات وراك صافات طوابير.
أحمد: هيه عيل شو تحسبين أخوج مب هين.
ساره:يالله غايوه خلينا نروح نرقد شويه،رمسة أحمد ما تخلص.
غايه: صدقج و الله........... يالله زرينا.
(غايوه و ساروه ماشيات لغرفتهن)
الكل: حافظنكن الله.
أحمد(واللقمه فأثمه):ههههه لو تقفلن البيبان .. شوي و بزوركن فأحلامكن الوردية.
ساره:ههه الله يعيني .. اليوم بجوف كوابيس .
غايه: ماعليه .. سوي تجهيزات قبل ما ترقدين.
ساره: صدقج و الله بحطي قلاص ماي عدالي.
(حمد و حرمته روحوا يرقدون،وتم أحمد ويا يدته يدق وياها سوالف..وقنعها إنها ما تترياه مره ثانيه لأنه عند محاضرات متأخرة،يعني إن تريته بيطوف وقت الغدا..وأحيانا يتغدى برع ويا الربع.. يعني إذا تمت تترياه هوه ما بيقدر يغيب عن البيت و يتأخر على راحته)
( من عوايد الاخوان الأربعه "حمد و راشد و شيخه و يمعه " إنهم كل جمعه يكون الغدا فبيت حمد ، عشان هو أكبرهم ، و بعد عشان أمهم فبيته،لكن صار تغيير على هاذي اليلسه العائليه،إنه عيال يمعه و حرمته ما صاروا ضمنهم بعد المشكله العائليه اللي صارت بينهم ، و خلت يمعه يشل عياله وياه بريطانيا، عشان سالفه ما تستاهل كل هالهجر و القطيعه)
(يوم الخميس على العصرفي العين،فبيت راشد أخو حمد كانت العيله الكريمه كلها يالسه)
راشد:هاا موزه،تراه هاليمعه الدور علينا في طبخ الغدا.
موزه: هييه أدري ما نسيت، بس ناقصنا شويت أغراض.
فهد:أمه اللي تبينه قوليلي إياه،عساس الليله بروح أتشرى كم اشغيله لجناحي.
عليا:فهد شلني وياك تراني ما اشتريت هديه حق غايووه.
فهد: ما تبا عليج شي.
الأم موزه: لا وليدي فظيحه ما تشتري حق بنت عمها هدية عرسها.
فهد(ما يداني يشل اخواته وياه ، يعرفهن يوم يدشن السوق ما يطيعن يطلعن منه إلا عقب محايل):لا حوول .. إن شاالله امايه بشلها..إذا الله أراد.
موزه(وهي قايمه عشان تتاكد من اللي ناقص المطبخ):زين ما سويت يوليدي.(راحت الام للمطبخ)
فهد(يطالع عليا): بس يا نظر عيوني،السيره بشروط.
عليا و عوااش: إشرط.
فهد: عواااش و انتي شو نقعج بعد ؟
عوااش: و الله ترمس جد إنته؟؟ بتشل علايه و ما بتشلني؟! لاالله ريلي على ريلكم.
عليا: هبي يا المخربه العوده،ما عندج شغله إلا تخربين عليه.
راشد الأبو: ياحافظ،يا عليا،تشترين حق بنت عمج،واختج ما تشتريلها،بعد ما يصير جذيه يا بنتي.
عليا: ما عليه خلاص..وإلا أقول إنتي استريحي و أنا بشتريلها من عندي و عندج (تبتسم).
عوااش:لا والله؟؟؟
فهد:هههه لوتيه يا علايه بس لواتج مب على عوااش.
الأبو راشد: يالله عيل عيالي بخليكم أحين.
علايه: وين بها بوعلي؟؟
راشد: بروح مزرعة عمج حمد جانج إلا تبين تروحين نشي؟
علايه:لالا أنا اليوم عندي مشواااار.(اطالع فهد)
راشد:عوااش ما بتخاويني و تخلين عنج سيرة السوق؟
عوااش:لالا ابويه،مره ثانيه .. تعرف ما ابغي علايه تستفرد بالكريم فهد هههه.
راشد:ههههه يالله عيل مع السلامه.
الكل: حافظنك الله.
فهد: الكريم فهد!! إللي تبغي تتشرى تشل وياها فلوسها .. إممممم أحين الهنتين بيروحن(يسكت شويه)........... عاد احين زادت الشروط.
عليا و عوااش(يتأففن): قول.
فهد: أولا يوم أقول بس من المشترى يعني بس .. ثانيا وحده منكن تدفع فلوس للبترول .. والثانيه تعشيني فالمطعم هههه.
عواااش: لا حشى عليه .. جان اخسر فلوسي على البترول والعشا .. امره ما نبا منيتك . غنووم بيشلنا.
غانم(يغني..وهو منبطح جدام التلفزيون و مندمج في المصارعة): في الأحلام ، في الأحلام ،(يرمس عادي) أنا أصلا شروطي أكثر و مكلفه أكثر بعد.
عليا: مب لازم بنروح ويا فهد ، على الأقل شيء أحسن عن شي المهم إنا نروح.
فهد: و إن ما سمعتن كلامي بردكن البيت سيده، و أغراظكن بعطيها البيدار.
فطوم(هي اخت غايوه والبقيه ، وحرمة علي أخو فهد و البقيه) ماعليه يفهد، بتلاحق إختي و بخبرها عن عمايلك السوده هاذي الله يعينها بس.
فهد: لا فطوووم لا تسوينها ، أنا غايوووه لو تبا عيوني بعطيها إياهن ، و لو تبا السوق بسفرها لأحسن مكان تتشرا منه.
عليا: نحن اخواتك بعد ، قبل لا تكون غايه حرمتك.
فهد(يغمض عيونه): غايه غير... غير.....غير.
علي: و الله يا خواتي أنا مشغول اليوم و الا بوديكن بدال هالخبيل.
فهد(يطالعه بعين): والله؟؟ علي ...........
فطوم(ما خلت ريلها يرد عليه، وخذت ريلها بإيدها اليمين و خلوف ولدها تسحبه بإيدها الشمال و روحت لقسمها عنه)
فهد: أبو لبسه يعني؟! .......... و الله لردها فيك يا بو خلوف.
عوااش:أحين الساعه كم السيره؟
فهد(مب عاطي عواش سالفه ، يالس يطلع المبايل من مخباه، دق الرقم)
فهد: يهلا بنظر عيني أنا.
عليا: منو يرمس؟
عواش: بعد منو غيرها...... غايوووه.
(يقوم فهد و ييلس في يلسه ثانيه ، بعيد ن صدعة اخواته)
غايه: أهلين غناتي.
فهد: ماكون أزعجتج؟
(البنات لحقنه و يلسن عداله ، وهو يكفخهن بإيده عشان يروحن عنه)
غايه: أزعجتني؟ لاالله فكيتني من صدعة سارووه.
فهد:ههههه متى بفكج منهم أنا هاذيلا، الظهر يدووه و أحين ساروووه.
غايه: ههههه شسوي؟ بدال ما يدللوني في آخر اسبوعين وياهم؟!
فهد:ههههه إللي يسمعج بيقول ، عقب اسبوعين حكم الإعدام عليج.
غايه:ههههههه على شو ناوي إنته؟
فهد: ناوي على أشياء وايده.
غايه: هههههه ما عليه إن ما خبرت عليك إمايه.
فهد(يتمصخر): والله؟؟.......... بعدج ويا سوالف اليهال هاذي.
غايه:هيه أنا بعدني ياهل ، ما طلعت من البيضه.
فهد: الله يعيني ، باخذلي بيبي ما تعرف شي فالدنيا.
غايه(بدلع): ماعليه، بتعطيني كورسات تعليميه.
فهد: يالله عيل لا تنسين مشترى قلم رصاص و مساحه و دفتر صغيروني ويا الزهبه.
غايه:ههههههه ما عليك هذا أول شي اشتريته.
فهد: على طاري المشترى ، الليله بودي البلاوي السوق، ما تبيني أييبلج شي؟
غايه: سلامة روحك.
فهد:لالا و الله ما تبين شي؟
غايه: اممممممممم هيه اتذكرت نسيت أشتري شنطه صغيره ، حق الدفتر والقلم والمساحه.
فهد: هههههه والله نسيتيها ......... أففاااا حد ينسى شغله مهمه مثل جيه؟
غايه:ههههههه شسوي صايره نسايه هالايام.
فهد: فديت هالضحكة يعلها دوم مب يوم ،، يالله عيل حياتي أخليج أحين.
غايه: خذ بالك من الدرب فليل ولا تسرع .. توكل على الله و لا تنسى الشنطة ههههه.
فهد: أوكيك ماي سويت هارت.
غايه: مع السلامه.
فهد: حافظنج الله غايووتي.
(بعد ما خلص فهد من الرمسه شردن اخواته عنه عن لا يحصلن هزبه محترمه منه ، وهن عالسلم)
عليا: فهد، متى الروحه أحين؟
فهد : لو ما تستاهلن،يالله زهبن أحين خمس دقايق و بلقاكن في السياره.
عواااش: ليش جيه مستعيل؟
فهد: با اشتري كم شغله مهمه، أخاف تخلص من السوق ، و إنتي ليش تخبرين؟؟ ممحمول و يترفس
عليا(ترمس عواااش وهن مروحات لغرفهن): هذا تخبل و إلا تخبل؟
عوااش: ههههه I THINK THAT جفتيه يوم كان يرمس غايوووه ولا كأنا كنا عنده ، حتى عقب ما خلص الرمسه ما قالنا شي.
عليا: هههههه صدقه علي يوم قال إنه فهد خبيل.
عوااش: علايه وين روح غنووم؟
عليا: هههه غنووم مثل الحيه يوم يسمع سالفة توصيله للسوق يشرد.
عوااش: والله أحسنهم علي،بس لو ما أشغاله الزايده هاذي جان بيودينا وين مانبا.
عليا: فديته معرس و ما يمانع .. مب غنوم إللي ما عنده شغله غير الجامعه و بعد ما يقضيلنا حايتنا..
عوااش: ولو حد من ربعه متصلبه نصايف الليل يبغيه يطلع وياه جان طلع.
عليا: إنتي أحين روحي إتجهزي قبل لا يطوفن الخمس دقايق و يلقاها فهد حجه ويروح عنا.
عوااش : يالله .... طياره و أنا تحت.
انتهى الجزء الثاني..
ابي توقعاتكم للجزء الجديد..
فهد وغاية..؟!!
ولا ننسى خالد وسعيد..؟!!
تحياتي...،
لحجز
مساحه لموقعكـ اضغط هنا \\
إعلانات الشركات تتم فقط من خلال الإعلان بجوجل ومن ثم استهداف موقع غرام
اضغط هنا 
رواية جميلة جداً..مقدر و لازم يصير..!! 
العرض العادي
