قصتي غرامي معتس فلم كرتون ........... تجي النهايه ما عرفت البدايه
مساكم الله بالخير ايها الزاحفون والزاحفات
قصتنا اليوم رومانسيه تقطع القلب وهي من الواقع حدثت لرفيدزكم بحور الي لما هالحين بصدمه من الي صار له
نصايح قبل القرايه :
1- تحذير حكومي قراية هذه القصة سبب رئيسي للصياح والمناشق وسيلان السائل المخاطي من الانف (محترم صح ) والكوابيس وانسداد الرئتين وتمدد المفاصل <<<<وش تبي ذي
2- اذا كنت توك مطلق او توك طالعن من علاقة غرامية فاشله فنصيحه ارعص رجوع وسو بحث باسم العضو الزين واقرا مواضيعه ووعد مني انه تبي تسبب لك قساوة قلب ماهيب طبيعية كل مواضيعه عن السكري وسوق التمر والا عن كوفي عنان
3-يحفظ الموضوع بعيدا عن متناول الاطفال وبدرجة حرارة مئويه بين 30 و15 درجة <<<< صار علاج ذا ماهوب موضوع على هالارشادات
4- خاص بالمشرفين : قبل شوي متصلن علي مسؤول موسوعة جينس للارقام القياسيه يقول اذا ثبتوا موضوعك ذا يبي يصير مثبتن لك موضوعين همن تبي تدخل الموسوعه همن نبي نرشحك لجائزة نوبل للزحف واكيد انك تبي تاخذه همن تبي تاخذ وسام الدوله من الدرجه الاولى همن تبي تسوي انقلاب ويبي يهجون الي معك وتبقى لحالك ويفشل الانقلاب وتدخل السجن همن بعض الناس يبي يقطعون ارقيبك بالسيف همن تصير عبرة لمن لايعتبر <<<<<<< يا اخوي بلا تثبيت بلا جائزة بلا وسام دام النهايه تسذا (ماعليش تراي تحمست والصراحة تسلسل الاحداث يتطلب النهايه الشنيعه ذي )
ساندرا رودريغز و بحور . . . . الخيانة التي قتلت الحب
الفصل الاول
انا رحت لكولومبيا ودرست في جامعة الزحف المفتوحه واكيد إن صارت لي علاقات هناك مع ناس اشكال وانواع لكن ومن اقوى العلاقات الي صارت لي هناك مع ثلاث اشخاص الاول معالي الدكتور سيزار كارلوس استاذي وقدوتي وصديقي والي يفزع معي دايم والثاني ساندرا رودريغز حبيبة القلب رمز التضحية والصمود والوفاء والوقوف في وجه الاعداء والثالث هو خوان كامبوس ملعون ابو الرقبه ابن الحرام مفرق الخلان والمنافس الدائم على قلب ساندرا
يومني هناك ادرس كنت اتردد على مزرعة الدكتور سيزار الي في راس الجبل الي يصنعون به الكوكائين وكنت اذا جيته يرحب ويهلي بي المهم كنت دايم اشوف عنده بنت عمره ( 64 سنه) زي القمر كنت اذا دخلت تناظرني همن اذا ناظرته صدت ايقاله ما تناظرن وانا بعد مثله المهم مع الايام بديت احس ان البنت تحبن ايه نعم تحبن عرفت انه تحبن من عيونه ما سمعتوا الشاعر الجاهلي امرؤ القيس بن شداد يقول :
من عيوني خذ مراسيل الغرام . . . . . تسان تفهم في لغة حب العيون
في يوم من الايام كنت رايحن اشتري شوي اغراض من السوق الا والله واقابله بالصدفه هناك وتسلم علي و تلزم الا تعزمن على كاس كوبتشينو في مقهى وقت القهوه ! ! ! الي بجنب دكتور كيف الي بشارع الملك عبدالله حقهم انا ماصدقت خبر المهم بدت العلاقه من هاك اليوم وبعده باسبوع واصارحه اني احبه قالت انا بعد رايحتن خرخر معك المهم انتشر الخبر بسرعه انتشار النار بالهشيم ( رجاء لا احد يسألن وش معناه ) وكل اهل بوغوتا (عاصمة كولومبيا ) يدرون عن الموضوع واثر فيه واحد رئيس عصابه اسمه خوان كامبيوس حاطن عينه عليه ابن الكلب مادريت الا مرسل لي ثلاثة ويكسرون باب شقتي ويدخلون علي ويهددونن وقالوا لولا انك من طلاب الدكتور سيزار تسان اغديناك من صيد امس
قلت : يا جماعة الخير وش السالفة
قالوا : السالفة وما فيها البنت ساندرا لا تهوب نحيتها
قلت : ليه طيب
قالوا : عشان السيد خوان كامبيوس حاطن عينه عليه
قلت : يصير خير
خوان كامبوس في لحظة غضب شديد وهو يهدد بالقتل
رحت للبنت وقلت له الموضوع قالت انا افديك بروحي ( والله اني عجزن اكمل وش قالت لكن اذا كنت قد غازلت بنت فالي قالت لك البنت ترى ساندرا قالته لي واذا ما عمرك غازلت طق راسك بالجدار فاضي لابوك انا اكسر اصابعي من الضغط على الكيبورد عشانك انت ووجهك <<<<<< يا اخوي لوك قايلن وش قالت والله انه اهون من هالحتسي )
المهم رحت للدكتور سيزار وعلمته السالفه لكن تفاجئت يوم قال لي لا تحرش بهالشخص تراه اقشر ما يعرف اللف الدوران وانصحك اول ماتاخذ شهادتك تروح لديرتك على طول ترى ماهوب مخليك ذا المجرم وكنا مقبلين على الاختبارات قطعت العلاقة معها وبعد الاختبارات حجزت للرياض وواعدت البنت وعلمته الموضوع وقلت امشي معي عيت وقعدت تصيح وتقول تكفى اقعد واهج معك للمكسيك والا لتشيلي
قلت ما اقدر وقبل اقلاع الطيارة ودعنا بعض
وقلت : له راجع لتس عن قريب
قالت : وانا ابنتظرك والله لو تقعد عشرين سنه انا انتظرك
ضميتها على صدري وقعدنا نصيح ولا فكنا الا صوت الميكروفون يقول على ركاب الرحلة رقم6473894 التوجه للبوابه رقم سبع وثلاثين ترى نبي نصك باب الطياره همن بل تذكرتك واشرب ميتها
ركبت الطيارة وانا اردد قول الشاعر
يا سندرا القلب ولع نار .......... والعين زادت مدامعها
ضاعت حياتي من الاشرار ...... والناس بانت مطامعها
ياهيه كامبوس طلع غدار ......... يبغى يفرق مجامعها
طارت الطيارة ووصلنا الرياض وكتمت الموضوع ولا علمت به احد حتى صديق العمر الاطخم
ومرت الايام ودارت الايام ونسيت ساندرا ورجعت حياتي مثل اول رجه وزحف .
ـــــــــــــــــــــــــــــــــــــــــــــ ـــــ ـــــــــــــــــــــــــــــــــــــــــــــ ـــــ ـــــــــــــــــــــــــــــــــــــــــــــ ـــــ ـــــــــــــــــــــــــــــــــــــــــــــ ـــــ ـــــــــــــــــــــــــــــــــــــــــــــ ـ
قال : نروح الثمامه ونشب لنا ضو ونتقهوى ونتشهوى(يعني نشرب شاهي) ومتى ما ملينا رجعنا
قلت : يا اخوي تشوف الوقت هالحين امسيان وانا مواصل لي ثلاث ايام مانمت
قال: يارجال انا لي خمس ايام مانمت
قلت : خلاص مرن
طوط . . . . . طوط. . . . .
بعد ربع ساعة الا التسعاوي عند الباب واركب معه ونمشي ومع دوار العويضه يسار لما وصلنا لنا مكانن زين براس طعس ونشب الضو ونبدا نتقهوى المهم الوقت وقت الغروب وانا قاعدن اتأمل الغروب المهم ويقوم الاطخم ويشغل مسجل التسعاوي الا فيه اغنية عبد الحليم حافظ الي تقول
يوم شغله طرت علي ساندرا على طول ويضيق صدري وماش تسنه بان على وجهي اني تغيرت بس ماطرى على بال الاطخم اني احب المهم قال شكله مايبي هالاغنية ويقوم ويطلع الشريط ويدخل شريط ام كلثوم الي فيه اغنيته المشهوره :
هل دمعي فوق خدي وانهمل . . . . . . واعذاب القلب من فرقا الحبيب
يوم شغله وانهار واقعد اصيح ويبلش بي الاطخم وراك يا ابن الحلال وشبك وانا اصيح ولا ارد عليه المهم بعد المحاولات علمته وش السالفه ويوم علمته
قال : افا عليك بس يا بحور والله لوه اكبر راس نغسل شراعه لك يا صديقي ( مسكين الاطخم يحسبه بالنسيم )
قلت : مانقدر له والا تسان انا تفاهمت معه يومي هناك
قال : انت وش عندك بكره
قلت: ماعندي شي
قال: اجل جهز عفشك
قلت : وش عندك
قال : نبي نروح لكولومبيا ونخطف البنت ونرجع
قلت: والله فكره بس منين لنا الفلوس
قال : والله انك صادز منين لنا فلوس
قعدنا نفكر منين نجيب الفلوس وحنا نفكر طرت علي فكرة
قلت: ليه مانبيع الثلاث طعش كيلو حشيش الي عندك ونسافر بهن
قال: الصراحه انا بايعهن
قلت : طيب وين الفلوس
قال : راحن باللعبه <<<<<< الحمار ابو حنش (ابو حنش هي كنية لـلاطخم) طايحن بالقمار هاليومين يلعب هو وشلة عرابجة في استراحه بالنظيم انا ما انقهرت انه راحت الفلوس انا الي قهرني انهم يلعبون اقمار ب ( الاونو واحد كرت )
قال: مافيه حل الا انك تبيع الكراسيدا الاكسل ( XL ) حقتك
قلت : الا ذي
قال : مافيه غيرها
قلت : صعبة والله ماتبي ندق على قدهـ111 غدي معه شي يسلفنا
قال : والله قدهـ111 مايقصر لكنه طفران هاليومين حتى يقولون العيال انه يتسلف حق الدخان من البنقالي حق المزرعه
وقعدت افكر همن قطع علي تفكيري
وقال : ترى الحب يبي تضحيه
قلت : شورك وهداية الله
مشينا ومن بكرا نروح معارض النسيم ونبيع الاكسل بعشر طعشرالف <<< (شغل نصب) ونقص التذاكر ويجي الاطخم ويقص تذكره ثالثة لواحد من اخوياه اسمه الزين المنطلق ويوم جا الموعد ونروح المطار ونركب الطياره وبعد ربع ساعة من الاقلاع بغى الطيار يوقف بالهوى ويفتح الباب ويجدع ابوحنش لانه تحرش بالمضيفه هالمشفوح ما عمره شاف عيشه <<<<<<<< لولا الله ثم المشرف تسان علمتكم وش سوى مير داري اني لو اعلمكم تسان لقيت تحت الموضوع مكتوب (آخر تعديل بواسطة قدهـ111، بالأمس الساعة 03:09 PM. )
وصلنا هناك وقلت ما حنا معلمين احد اننا جايين اخاف يدري خوان كامبوس همن من يفكنا منه استعرنا جمس برازيلي من واحداعرفه واول يوم امرحنا بالخلا وثاني يوم نزلنا للديرة على الجمس ورحت للمكان الي بالعادة تروح له ساندرا دايم حول وقت القهوه المهم يوم وصلنا ونوقف على جال الخط نحتريه وقبل اذان المغرب بشوي الا هذي ساندرا جايه لكن
وش اشوف
اصدق عيوني والا اكذبها
لا ماهوب معقول
معقول هذي ساندرا
معقول هذي حبيبة القلب
معقول هذي الي ضحيت عشانه
معقول هذي الي خاطرت بروحي عشانه
معقول هذي الي جينا من الرياض عشانه
معقول هذي الي بعت الاكسل عشانه
معقول
معقول
معقول ساندرا تمشي مع رجال غيري
معقول ساندرا تحب غيري
وقفت محتار واصيح بس ماصدقت قلت لازم نتأكد ونقوم نرسل الاخ الزين للمقهى مارحت انا عشانهم يعرفونن دخل الزين وسولف شوي مع المحاسب وسأله عن ساندرا قال المحاسب ايه والله هذي ساندرا الرودريغز وتحب هالرجال جاء الزين وعلمنا السالفة انصدمت وقعدت اصيح المهم
وافقت وقلت العوض ولا القطيعه خطفناه وهي يوم شافتن اعتذرت وقالت لا يهمك ترى القلب معك وانا ابروح معكم برضاي واجي واحطه على الباب الايمن واركب بجنبه والزين بجنبي وابو حنش يسوق المهم ونهج من العاصمه وحنا بالطريق وقفنا عند محطه وكان فيه عرابجى موجودين بالمحطة يناظرونا المهم نزلت ساندرا الطخمه ودخلت الحمام (الله يكرمكم) ويوم قعدنا شوي الا ونسمع صراخه الا فيه واحد من العرابجى جاء من ورى ودخل عليه يحاول يفتح باب الحمام ونقوم حنا نفزع وندخل عليه ونغسل شراعه ويجون العرابجى ونتهاوش معهم وتطب علينا الحكومه ويسحبونا للقسم واقوم ارفع قضيه عليهم بتهمة التحرش الجنسي المهم يوم جاء المحامي وشاف وجه ساندرا قال ما انصحكم تخلونه تحرش جنسي لأن القاضي ماهوب مصدق ترى وجهه مايساعد وبتخسرون القضيه
قلت : وش السواة
قال : خلوه محاولة سرقة محفظة احسن
هذا الجمس الي استعرناه من خويي <<<<<<<< قدهـ111 ماعليش مع انك خويي الا ان جمسه احسن من جمسك
بعدين تنازلنا عن القضيه ومشينا ومسكنا الخط وبنص الخط وقف ابوحنش على جنب
وقال : انزل ابيك بسالفة
نزلت وقلت: وش فيك
قال : انت صاحي تحب وحده خانتك وشفته بعينك تمشي مع غيرك
قلت : وش تقصد
قال: مثل ما اغدرت بك اغدربه وخل نخليه بهالمقطعه غديه تموت <<<<<<< والله يا هو نذل
قلت : هذا الراي
قال : هذا الراي
المهم وانزله بالمقطعه واتفل عليه وهي تقول خلاص خل نفتح صفحه جديدة قلت اندزلعي وهمن رجعنا للعاصمه ونتعشى عند الدكتور سيزار وهمن رجعنا الجمس لراعيه ومن باتسر رجعنا للرياض ونروح لبيت الي شرى الكراسيداونسرقه ونشق الشعيب وترجع لي سيارتي وانسى الحب وهالحين كل يوم اشغل
خلاص من حبكم يا زين عزلنا . . . . . . ما عاد لي في هواكم شف او راده
السبيكة الي بعنا عليه الاكسل همن سرقناه
يلا تقلعوا خلاص انبسطتو خلصت القصة
ودمتم بخير
ملطوش مع بعض البهارات
آخر تعديل بحـ الوله ـور يوم 26-11-2006 في 11:28 AM.
رد : ساندرا رودريغز وخزان . . . الخيانة التي قتلت الحب <<< قصة زاحفة بتعجبك 
